Nye funksjonar på rettsrad.no
Vi har i dag lagt til nokre nye funksjonar og gjort nokre mindre endringar i den elektroniske skjemaløysinga rettsrad.no.
Saker om foreldreansvar, dagleg omsorg og samværsrett
I saker om foreldreansvar, dagleg omsorg og samværsrett, er det krav om at mekling skal gjennomførast mellom partane, jf. ekteskapslova § 26 og barnelova § 51. Dersom mekling ikkje er gjennomført, kan ikkje advokaten eigeninnvilge fritt rettsråd, jf. rundskriv SRF-1/2017 pkt. 6.4.2. Ved val av denne sakstypen i stykkprissaker, kjem det no opp ein «avkryssingsboks» som er obligatorisk for advokat/advokatfullmektig/rettshjelpar å markere før han/ho får gå vidare i skjemaet. For søknader er avkryssingsboksen valfri.
Søknad om fri sakførsel i uprioriterte saker
Etter rettshjelpsforskrifta § 4-2 er det Fylkesmannen som har kompetanse til å innvilge fri sakførsel i uprioriterte saker etter rettshjelpslova § 16, 3.ledd, sjå rundskriv SRF-1/2017 pkt. 2.6.2. Vi har derfor lagt til rette for at advokatar/advokatfullmektigar/rettshjelparar kan sende inn søknader om fri sakførsel i uprioriterte saker gjennom den elektroniske skjemaløysinga. Ved val av upriortert sak under utfylling av skjema, kan søkjar velje mellom fritt rettsråd i uprioriterte saker etter rettshjelpslova § 11 tredje ledd, eller fri sakførsel i uprioriterte saker etter rettshjelpslova § 16 tredje ledd.
Endringar i statusomgrep mm.
Elles er det gjort nokre mindre endringar i skjemaløysinga på grunnlag av tilbakemeldingar frå brukarane sidan førre oppdatering. Mellom anna er det gjort endringar i statusomgrepa for dei elektronisk innsendte sakene. Det er lagt til nye statusar «Avslått» og «VentSvar», og i tillegg er statusen «Sendt» erstatta med «Utbetalt». Endringane i statusomgrepa er gjort for å sikre ein meir presis informasjon i saksoversiktene til advokatane/advokatfullmektigane/rettshjelparane og for sakshandsamarane hos fylkesmannsembeta. Det er også gjort nokre mindre endringar i hjelpetekstar og sakshandsamingsfunksjonar.
Om du har spørsmål, kan du ta kontakt med Brukarstøtte på rettshjelp@fylkesmannen.no .
Publisert 16.05.2017 Sist endra 18.05.2017
Statusbegrep på saker i løysinga
Her finn du oversikt over ulike statusbegrep som er nytta i løysinga på søknader og stykkpris saker:
| Begrep | Forklaring |
| Ny | Nye søknader/stykkprissaker som ikkje er opna hjå Fylkesmannen. |
| Lest | Søknader/stykkprissaker som er opna og lest, evt. under handsaming hjå Fylkesmannen. |
| Godkjent | Blir brukt på elektroniske søknader der det ikkje er lagt ved salærkrav, og som blir godkjent av Fylkesmannen. I slike saker må advokat/fullmektig/rettshjelpar sende inn ny sak vedlagt krav/faktura til Fylkesmannen i tråd med tidlegare godkjenning. |
| Avvist | Krav som ikkje blir handsama på grunn av at dei er feilsendt, manglar tilstrekkelege opplysningar e.l. Denne statusen skal nyttast for krav der det ikkje er mogleg å vurdere om vilkåra for fritt rettsråd er oppfylt. |
| Utbetalt | Krav som er sendt til utbetaling/utbetalt av Fylkesmannen. |
| Sletta | Krav som er sletta. Desse forsvinn frå oversikta til advokat/sakshandsamar, men kan søkjast opp att av administrator. |
| Avslått | Krav som er avslått av Fylkesmannen fordi vilkåra for fritt rettsråd ikkje er oppfylt. Gjeld både eigeninnvilga stykkprissaker som blir omgjort og søknader som blir avslått. |
| VentSvar | Søknad/stykkprissaker der sakshandsamar har etterspurt ytterlegare informasjon i saka, og ventar på svar frå advokat/fullmektig/rettshjelpar. |